साहित्यकार विजय वान्तवा “कैलाशी”द्वारा हरेक बर्ष प्रदान गरिने चौथो शशीप्रभा स्मृति पुरस्कार २०२५ को निम्ति साहित्य सर्जकहरूप्रति कृतिहरू पठाइदिने आव्हान गरिएको छ। साहित्य सुनौं परिवार, मिरिक र रिपोटर्स क्लब अफ मिरिकको संयुक्त सभा शशी प्रभा स्मृति पुरस्कारदाता साहित्यकार विजय वान्तवा कैलाशीको अध्यक्षतामा साहित्य सुनौं परिवारका मूलसचिव वाइ. एन. ढकालका वासगृहमा बसेको थियो। चर्चा परिचर्चापछि यस वर्ष २०२५ को चौथो शशीप्रभा स्मृति पुरस्कार समारोह साहित्य सुनौं परिवार अनि रिपोटर्स क्लब अफ मिरिकले संयुक्त रूपमा आयोजना गर्ने निर्णय गरियो। यो सभामा साहित्य सुनौं परिवार मिरिकको पक्षबाट संस्थाका मूलसचिव वाइ. एन. ढकाल र सह सचिव अजम प्रधान उपस्थित थिए भने रिपोटर्स क्लब अफ मिरिकको पक्षबाट अध्यक्ष मुस्कान राई “खेसहाङ “अनि सचिव प्रवेश हाङखिम, उपध्याक्ष बिनोद प्रसाईं अनि कोषाध्यक्ष विषण राई उपस्थित थिए। सभामा पुरस्कारको निम्ति अनुवाद साहित्यिक कृति छोडेर २०२३ देखि २०२५ सम्म प्रकाशित भारतीय नेपाली साहित्यकारहरूको विभिन्न विधामा लेखिएका नेपाली कृतिहरू पुरस्कार छनौटको निम्ति ३ प्रति आगामी १० सेप्टेम्बर २०२५सम्म अध्यक्ष/सचिव ,साहित्य सुनौं परिवार मिरिक, स्टेट ब्यांक बिल्डिङ्गको तल्लो तला, कृष्णनगर मिरिक, हुलाक मिरिक ७३४२१४, दार्जीलिङ, पश्चिम बंगालको ठेगानामा पठाउन पर्नेछ।
शशीप्रभा स्मृति पुरस्कारको नगद राशि रूपियाँ पचास हजार (रूपियाँ ५००००) रहेको छ। यसका लागि मिरिकमा एक भव्य साहित्यिक कार्यक्रमबीच पुरस्कार अलङ्करण गरिने साहित्य सुनौं परिवारका सहासचिव अजम प्रधानले जनाएका छन्।
