महँगो साग-सब्जीले साधरण मानिस समस्यामा

खरसाङ, (निसं): वर्तमानमा साग-सब्जीको मूल्यमा भएको वृद्धिले साधरण मानिसहरू मर्कामा छन्‌‍। अहिले खरसाङ्मा टमाटरको मूल्य 80-90 रुपियाँ किलोग्राम रहेको मानिसहरूले बताएका छन्‌‍। कतिपयले दुई दिन अघि टमाटर मूल्य 1 सय 20 रुपियाँंमा खरिद गरेको पनि गुनासो गरेका छन्‌‍। अहिले खरसाङ्मा पोटलको मूल्य 80 रुपियाँ किलो, भेन्डी 80 रुपियाँ किलो, करेला 80 रुपियाँ किलो, आलु होल्याण्ड 30 रुपियाँ किलो, भोटान आलु 45 रुपियाँ किलो रहेको पाइएको छ। यसरी साग-सब्जीको मूल्यमा भएको वृद्धिको कारण निम्न वर्ग अनि निम्न मध्यवर्गीय परिवारलाई निकै समस्या भइरहेको थाहा लागेको छ। खरसाङ्को मन्टभियट निवासी एक गृहणीले वर्तमानमा साग-सब्जीको मूल्य अधिक रहेकोले आफूले स्कूसको मुन्टा र निगुरोले छाक टार्ने गरेको बताएकी छन्‌‍। तिनले आफ्नो पति दैनिक मजदुरीको काम गर्ने गरेको बताउदै वर्तमानमा इस्लामपूरका मजदुरहरूको संख्या धेरै भएकोले नियमित पतिले काम पनि नपाउने गरेको र यस्तो अवस्थामा महँगो साग-सब्जी खरिद गर्न पर्दा निकै समस्या हुने गरेको बताइन्‌‍। यस बारेमा सब्जी बिक्रेताहरूसित प्रश्न गर्दा अफूहरूले सिलगढ़ीबाट खरिद गरेर ल्याउने गरेको र सिलगढ़ीमा अधिक दाम भएपछि त्यस्तै हिसाबले बिक्री गर्न पर्ने बताए। कतिपयले सिलगढ़ी अनि पहाड़को गाउँ-बस्तीबाट साग-सब्जी अधिक मूल्यमा आफ्नो दोकानमा आइरहेको, वर्षाकालमा प्रत्येक वर्ष यस्तै हुने गरेको बताए।